Arquivo | Artigos RSS feed for this section

Manifesto da VII ANDAINA pola Protección da Serra do Galiñeiro

25 Out

21 de Outubro de 2018
Sechu López

“Non se sabe o que temos ata que se perde”. A Serra do Galiñeiro sempre estivo aí, dende moito antes de nacer o primeiro galego, pero cada xeración debe esforzarse por protexela, pois acumula un gran valor; non debemos estar inactivos ante ameazas que a poden estragar, como a instalación de modernos muíños de vento ou a apertura de minas a ceo aberto ou por calquera outra explotación agresiva, que ademais suporían novas pistas e máis movementos de terra; entón levaríamos as mans á cabeza ante a tremenda desfeita, pero xa demasiado tarde para reaccionar, o dano sería irreversible.

Dende hai anos a biodiversidade deste importante paraxe montañoso granítico, gran referente paisaxístico paralelo á Ría de Vigo, situado na área de maior densidade de poboación de Galicia, ven soportando a grave e continua ameaza dos seus valores naturais, culturais e sociais, e mesmo económicos sostibles, polo que existe unha continua demanda social que reclama dende hai décadas a súa protección legal para mantelo a salvo de explotacións incompatibles coa conservación deses valores e facilitar un modelo de desenvolvemento sostible das numerosas e variadas actividades posibles (deportivas, recreativas, forestais, gandeiras, culturais, educación ambiental, turísticas…), pedindo a inclusión na Rede Natura 2000 e a declaración de Parque Natural.


Os veciños da Serra, habitantes de Vigo, Gondomar, O Porriño, Mos e Tui, poden gozar facilmente da súa singularidade e simbolismo, polo que son eles os máis interesados na súa protección e desenvolvemento, pero calquera persoa que a coñeza, sexa veciño ou non, estará de acordo en que os seus valores merecen ser preservados.

Seguir lendo

Advertisements

A Plataforma ofrece asesoramento ás CCMM para a restauración do monte

2 Nov

Dende a Plataforma pola Protección da Serra do Galiñeiro queremos ofertar ás comunidades de montes situadas neste enclave natural e que sufriran os lumes de comezos do mes de outubro a posibilidade de seren asesoradas gratuitamente por un equipo de biólogos e persoal técnico con formación en restauración de ecosistemas de cara a pór en marcha as medidas de restauración convintes nos terreos que foran afectados polo lume.

Que facer logo dos incendios?

Grazas a todas e todos pola vosa solidariedade !!!

2 Nov

Despois de termos asimilado o acontecido, e calmados todos os sentimentos que abrollaron ante tamaña desfeita a tódolos niveis, sabemos que nos temos que dirixir ás persoas, que nestas datas foron quen de estar ahí, ao pé do Galiñeiro, preocupadas polo seu futuro e artellando xeitos de axudar na súa recuperación.

Tedes que ter en conta, que para moitos de nós, o Gali é como unha parte máis do noso corpo, a paisaxe que vemos e sentimos máis próxima, que mantén o aire que respiramos, a terra na que plantamos, a rocha na que cimentamos as nosas casas, e que nos regala a auga coa que circulamos tódolos seres vivos que nos mantemos grazas a el.

Os periodos de dor son estranos, e dependen de moitísimos factores, culturais, familiares, relixiosos…, pero moitas de nós, só podemos sentir unha fondísima tristura, a pesares de que estamos seguras de que “a nosa terriña é moi boa, e que todo volverá rebrotar”. Moitas das persoas que formamos a Plataforma Pola Defensa da Serra do Galiñeiro aínda non nos atrevemos a levantar os ollos cada vez que saimos da casa, para non percibir cos ollos, o co naris, é unha peste a queimado que dá arcadas.

Por outra banda, somos conscientes que temos que pomos coa cabeza a pensar en que facer, e como seguir adiante co proxecto de Parque Natural, ante tanta devastación. Podemos falar de moitos culpables, podemos pensar que unha vez máis, o lume chegou, e como non, volverá a pasar, como algo que xa temos asumido, porque o levamos vivindo así dende sempre. Todas as persoas que andamos no monte, somos moi conscientes de que hai UN culpable, UN, que estraga solos e humedais, que inza a nosa terra de follas, caracolas e paus, que non xeneran máis que broza, que nin para estrume serve, pero si que arde moi ben, e por enriba, revive co lume e espállase por onde quixer. Non lle vou dar a categoría de algo, por iso non o nomeo, non quero polo ao mesmo nivel que as ovellas, as cabras, as vespas, as abellas, as eguas, as raposas, e todas aquelas criaturas que nos quitou. Por non ter, non ten nin un verde que dea vida, é un verde agoniado.

A Plataforma pola Protección da Serra do Galiñeiro está composta por colectivos moi diversos e especializados, en temas moi diferentes no entorno natural e cultural da Serra. Por eso, nos gostaría que se contara con nós á hora de facer calquera actuación no monte, co ánimo de asesorar para preservar aquelo que sabemos que o mantén, como unha serra moi especial.

Por outra banda, sabemos que o voluntariado ten toda a vontade de axudar, pero as repoboacións, si é que se decide facelas, as talas e outras actuacións, deberían ser o máis selectas e coidadosas posibles, porque desta volta, o que aconteceu é moi grave e de grandes dimensións, e podemos estragar o monte para sempre.

Para preservar o Galiñeiro hai que querelo e respetalo, deixalo recuperarse en paz e loitar pola súa conservación, na medida das nosas posibilidades. Non esquencernos de que sobre el, están proxectadas outras desfeitas tan perigosas como o lume ou os monocultivos, por iso recordamos, que calquera época é boa para achegarnos ao Galiñeiro e dende calquera lugar, imos ter que activar as nosas forzas, na súa conservación.

Plataforma Pola Conservación da Serra do Galiñeiro.

Galería

Fotos da VI Andaina pola protección da serra do Galiñeiro

19 Abr

XUNTANZA COA OFICINA DE MEDIO AMBIENTE DA UNIVERSIDADE

16 Feb

O pasado día 15 de xaneiro a Plataforma pola Protección da Serra do Galiñeiro mantivo unha xuntanza con técnicos da Oficina de Medio Ambiente (OMA) da Universidade de Vigo. A reunión, derivada da carta que enviamos á Universidade en maio de 2013, fora solicitada polo reitorado na súa contestación. A súa finalidade, abordar unha iniciativa de declaración da serra do Galiñeiro como Parque Natural, iniciativa que a Universidade de Vigo se comprometeu a elevar á Xunta de Galicia.

Galiñeiro vista mar

Foi unha primeira toma de contacto, onde falamos longamente sobre a situación en que se encontra actualmente a serra do Galiñeiro; nomeadamente, sobre o estado dos proxectos máis ameazantes a que se enfronta a serra: o parque eólico e o concurso mineiro de febreiro de 2013.

Concordamos en que a figura de Parque Natural, concebida como ampliación do actual Parque Natural do Monte Aloia, resultaría a máis acaída para a protección da serra do Galiñeiro. Manifestáronos que o plantexamento da Universidade é instar á Xunta de Galicia a que inicie o procedemento para declarar a serra do Galiñeiro como Parque Natural. A competencia legal para iniciar o proceso é exclusiva da Consellaria de Medio Ambiente, tal e como marca a Lei de patrimonio natural e da biodiversidade. Sen embargo, que a Universidade tome a iniciativa e eleve unha proposta de protección diante da Administración constuiría para nós un respaldo moral moi importante.

Quedamos en volver a reunirnos para irmos perfilando esta iniciativa, estudar que forma darlle (xa que non existe un procedemento legal para este caso); que extensión e profundidade debería ter o informe, etc. Trataríase en todo caso de utilizar aquela información que poida existir nos arquivos da Universidade, máis aquela que nós mesmos desde a Plataforma poderíamos aportar.

A Oficina de Medio Ambiente da Universidade de Vigo adícase a promover a sustentabilidade dentro do ámbito universitario. Cómpre destacar a xestión que realizan nas áreas verdes do Campus, moi avanzada canto á recuperación das formacións vexetais autóctonas, e a implementación de medidas para o fomento da biodiversidade nos terreos da Universidade. Valoramos moi positivamente esta primeira xuntanza, que  podería ser o inicio dunha relación moi enriquecedora para ambas as dúas partes.

Sechu López coa Plataforma pola defensa da Serra do Galiñeiro

20 Xuñ

Pouco despois da conquista do Anapurna o pasado 6 de maio, Sechu López  aparece así de guapo na súa primeira entrevista concedida logo da proeza poucos días despois en Kathmandu, xusto o día anterior á III Andaina pola defensa da Serra do Galinheiro.

Agradecemos moi especialmente a Sechu López que se lembrara da Serra do Galiñeiro en eses especiais momentos, ofrecendo o seu público apoio. As montañas grandes son importantes mais as pequenas tamén.

Grazas Sechu.

Manifesto en defensa da Serra do Galiñeiro

26 Abr

O avance do deterioro do medio natural en Galicia ten hoxe un dos máis claros e infamantes exemplos na grave situación que vive a Serra do Galiñeiro, espazo de extraordinario valor que comparten os concellos de Vigo, Gondomar, Mos, O Porriño e Tui.

            A  pesar de que no ano 2008 se anunciaba a ampliación do Parque Natural do Monte Aloia a todo o cordal da Serra do Galiñeiro, aínda hoxe a desprotección dos seus valores naturais, culturais, sociais e económicos continúa sendo total.

            Aínda hoxe os demostrados valores xeolóxicos, biolóxicos, paisaxísticos, históricos, arqueolóxicos, etnográficos, etc  deste espazo senlleiro no que se recoñecen os habitantes de todos estes concellos continúan estando en perigo diante das agresións producidas polo grave impacto de actividades irresponsables co medio (proliferación de canteiras, vertedoiros e pistas, política forestal de extensión de especies foráneas, destrución do patrimonio arqueolóxico…) e de proxectos que o degradarían irreversiblemente (parque eólico, estradas de circunvalación, industria trituradora…).

            O Corno do Demo e tódolos contos e lendas do Galiñeiro non teñen prezo. A gandería ecolóxica de pastoreo, os cabalos do monte e os curros de Vincios e de Morgadáns non teñen prezo. O lecer, os camiños, os subeiros, as pedras, as sombras, as augas, os estudos feitos e os que aínda se han facer, as illas ó lonxe, os poemas e os libros, o que perdemos e atopamos no Galiñeiro, nada de todo iso ten un valor calculable porque ese é un patrimonio común e natural que non se pode comprar nin vender, un patrimonio destas bisbarras, da Terra de Turonio, pero tamén de Galicia e mais da Humanidade.

            Cómpre rematar con todo isto. Cómpre que a Xunta de Galicia acometa dunha vez a protección da Serra. Cómpre que se estenda o Parque Natural do Monte Aloia a todo o cordal do Galiñeiro seguindo a lóxica do que é un mesmo ecosistema.

            Protexamos o que é noso e é de todos!  

            Protexamos a terra e mailo monte que nos deron!

            Protexamos o medio natural e a cultura!          

            Protexamos o Galiñeiro!

Seguir lendo