A Plataforma pola protección da serra do Galiñeiro, estivo presente na inauguración da escultura “O Guerreiro do Galiñeiro” obra do escultor mosense Marcos Escudero, en homenaxe ás persoas e entidades que loitan pola protección da serra do Galiñeiro.
● A Coordinadora Eólica Así Non advirte dos danos irreparábeis e sen precedentes desta vaga eólica no país.
Santiago de Compostela, a 23 de abril de 2022.- Este domingo, 23 de abril, a Coordinadora “Eólica Así Non” volveu mobilizar ao pobo galego en contra da actual depredación macroeólica especulativa, que desta volta, conseguiu rodear cunha cadea humana multitudinaria todo o perímetro das depedencias da Xunta de Galicia, en San Caetano, Santiago de Compostela. A pesar da chuvia, máis de 2000 persoas acudiron á mobilizacón de “Eólica Así Non” para esixirlle á Xunta de Galicia o rexeitamento de máis de
75 proxectos eólicos que xa contan coa declaración de impacto ambiental favorable da Consellaría de Medio Ambiente, e que nos vindeiros dous días poderían acadar a autorización previa administrativa do goberno galego. O vindeiro 25 de abril é a data límite establecida polo Real Decreto-Lei 23/2020 para que 77 parques eólicos tramitados na Xunta obteñan autorización administrativa e manteñan vixente o permiso de conexión á rede. Ao mesmo tempo, os milleiros de manifestantes congregados arredor do edificio administrativo da Xunta instaron ao Executivo galego a paralizar outros máis de 150 proxectos eólicos que, malia á suposta moratoria eólica de Feijóo, manteñen en curso a súa tramitación, coa pretensión de seren autorizados.
Desde a Coordinadora Eóilca Así Non advírtese dos danos irreversíbeis ambientais, patrimoniais, sociais e económicos que esta vaga eólica carrexará para o país se os gobernos galego e estatal non frean tal despropósito e non planifican adecuadamente a implantación de renovábeis. Lembra que todas as máis de 200 entidades e colectivos que
conforman a Coordinadora apoian as enerxías renovábeis para acadar unha transición ecolóxica e socialmente xusta, pero non a calquera prezo. Os máis de 75 macroproxectos eólicos que a Xunta está a punto de autorizar, sen unha adecuada avaliación ambiental e por vías exprés e antidemocráticas, poñen en risco a preservación dos espazos naturais de maior valor ambiental do país e a conectividade ecolóxica, a disposición de recursos básicos para a vida como a auga, destrúen biodiversidade e moitos dos ecosistemas que son imprescindíbeis para afrontar o reto climático, eliminan terras de cultivo de alimentos, destrúen a paisaxe e patrimonio histórico e cultural, prexudican formas de vida tradicionais e sustentábeis, expulsan as persoas do rural e poderían afectar de forma singular á saúde das poboacións máis próximas aos aeroxeradores, alén da depreciación de valor que sufrirán todos os bens e inmobles situados dentro das poligonais eólicas.
“As consecuencias serían dramáticas. A autorización destes proxectos sería unha auténtica catástrofe ambiental e social sen precedentes, na que en especial o medio ambiente e o rural galegos ficarían dilapidados para sempre e en mans de multinacionais destrutoras do territorio. Os galegos e galegas non podemos nin debemos tolerar este asalto ao país, e así llo facemos saber aos que nos gobernan”.
Seguir lendo
Este martes 25 de abril é a data límite establecida pola normativa vixente para outorgar autorización previa aos proxectos eólicos promovidos en Galiza con declaración de impacto ambiental favorábel. Desde a Coordinadora Eólica Así Non fixemos esta convocatoria a participar nesta nova mobilización en Santiago de Compostela aos galegos e galegas, ás plataformas de veciños e veciñas afectadas e a todo tipo de colectivos e entidades críticas co actual modelo depredador da enerxía eólica. E así, rodeamos hoxe o edificio da Xunta de Galicia aquí en San Caetano, para manifestar a nosa repulsa aos 77 proxectos eólicos con declaración de impacto ambiental positiva, cuxa aprobación podería ser este mesmo martes.
E que buscamos con esta mobilización? Queremos exixir ao executivo galego que denegue as autorizacións das ducias de macroparques eólicos aos que a Consellaría de Medio Ambiente xa outorgou permiso ambiental o pasado mes de xaneiro. Estes 77 parques eólicos teñen de prazo límite ata este 25 de abril para poder acadar autorización previa administrativa por parte da Xunta.
Tamén exiximos a inmediata paralización duns 150 expedientes eólicos que a Xunta de Galiza aínda mantén en tramitación.
Seguir lendoEste domingo, 11 de decembro, o pobo galego volveuse mobilizar masivamente a prol das montañas e do rural galego e en contra da actual invasión eólica que ameaza o noso territorio. Máis de 3000 persoas, segundo datos recollidos ata o momento, participaron nas 19 mobilizacións convocadas en diferentes localidades galegas pola coordinadora “Eólica Así Non”, con motivo do Día mundial das Montañas e co gallo de reivindicar diante das administracións públicas a preservación destes ecosistemas fundamentais para a vida fronte ao actual espolio eólico,
A Plataforma pola protección da serra do Galiñeiro, acudío a Moaña coas compañeiras e compañeiros de Eólicos no Morrado NON !!! para reivindicar a preservación medioambiental ante a barbarie eólica que estamos a sofrer.
A Plataforma pola protección da serra do Galiñeiro agradece ás persoas que asistiron onte a manifestación en Compostela co gaio do Día do Medioambiente, en especial aos amigos/as, veciños/veciñas que estiveron ao pé da nosa pancarta. As montañas de todo o país precisan de nós!
Gondomar, 27 de maio do 2022
A Plataforma pola protección da serra do Galiñeiro, xunto coa Coordinadora “Eólica, Así Non” e os restantes 184 colectivos que a conforman, convoca á manifestación do Día dia do Medio Ambiente.
Este ano a idea reivindicativa é referida á ENERXÍA, en clara defensa de todas as montañas galegas ante os proxectos eólicos. Pero desgraciadamente hai outras problemáticas que sobrevoan os nosos montes: a minaría é outra vaga que percorre todo o territorio. Nas últimas semanas en diversos medios de comunicación estamos nós de actualidade, buscan en Galiñeiro Terras Raras. Pero en toda Galicia pescudan outros minerais…. Intentan apañalos a calquera prezo, a calquera prezo do que os insumos negativos recaian no pobo e na natureza!!!
GRAN MARCHA NO DÍA DO MEDIO AMBIENTE 2022
TEMOS ALTERNATIVA!
ENERXÍA XUSTA E SUSTENTÁBEL
ENERXÍA POR E PARA O POBO
A transición ecolóxica e a descarbonización da economía, necesariamente implica o abandono dos combustíbeis fósiles e o fomento doutras formas de enerxía renovábel, pero significa tamén rachar co modelo tradicional de produción e consumo de enerxía. O modelo de transición que se está a impoñer polos gobernos da Xunta e do Estado español non responde aos principios dunha transición ecolóxica xusta, nin arranxa os defectos estruturais do actual sistema enerxético. Séguese apostando pola destrución do territorio, polo espolio de recursos naturais, pola perda de biodiversidade, pola produción intensiva e centralizada da enerxía, por consumidores pasivos e cautivos, por manter os privilexios do lobby enerxético e por primar o interese privado sobre o público. As grandes corporacións empresariais son as que planifican, valéndose de inxentes recursos públicos, e os gobernos limítanse a executar unha transición enerxética cada vez máis inxusta social e territorialmente. O actual modelo de implantación de enerxías renovábeis na Galiza tampouco contribúe a superar o reto climático, pois destrúe hábitats e recursos que son esenciais para a preservación da vida humana no planeta. Este modelo, sustentado nos piares da lóxica do crecemento capitalista, incluso pretende outorgar o cuño verde ao gas fósil e á enerxía nuclear.
ASUNTO: Concentración reivindicativa “Non imos calar!” pola defensa do dereito de acceso á información e participación pública nos procedementos relacionados coa actual vaga eólica.
CONVOCA: Coordinadora EÓLICA ASÍ NON.
LUGAR: Diante do Parlamento de Galicia e da Valedora do Pobo, en Santiago de Compostela.
DÍA E HORA: mércores, 23 de marzo, ás 12:00 horas.
Compostela, 22 de marzo de 2022.- A Coordinadora “Eólica así non” convoca aos medios de prensa á concentración que terá lugar mañá mércores, 23 de marzo, ás 12 horas, diante do Parlamento Galego e da Valedora do Pobo, para denunciar o recurte de dereitos democráticos da cidadanía durante a actual vaga eólica e esixir ao presidente da Xunta a derrogación das “leis de depredación”, entre outras medidas.
Agardando que sexa do voso interese, recibide un cordial saúdo,
COORDINADORA EÓLICA ASÍ NON
 |
 |
serragalinheiro.wordpress.com 