Cartas enviadas á Presidenta do CXPJ e o Presidente do TSXG

AO PRESIDENTE DO TRIBUNAL SUPERIOR DE XUSTIZA DE GALIZA

A Plataforma pola protección da serra do Galiñeiro, EXPÓN:

Que ante os recentes cambios executados pola Presidencia da Sala do Contencioso-Administrativo do Tribunal que vostede preside, que se materializaron na modificación da composición das Sección Terceira e Cuarta da dita Sala, entendemos oportuno dirixirnos a vostede para manifestarlle a nosa máis profunda preocupación, polas razóns que pasamos a desenvolver:

1ª. Tendo trascendido á opinión pública a resolución da Presidenta da Sala referida, datada o pasado 12 de marzo, na que se plasman os cambios referidos, tivemos coñecemento de que os mesmos se motivan na necesidade de “salvagardar a aparencia e a realidade da imparcialidade con que funciona esta Sala”, e iso tras o pronunciamiento de tres sentenzas polo Tribunal Supremo a finais de 2025 nas que se declarou vulnerado o dereito ao xuíz imparcial pola intervención do maxistrado Villares Naveira en tres procesos concretos.
Por outra banda, tamén transcendeu á opinión pública o comunicado de Xuíces e Xuíces para a Democracia, no cal se refire que os traslados de maxistrados/as acordados noutra Resolución da presidenta da Sala da mesma data tiveron carácter forzoso.

2ª. Tralas resolucións referidas, e en relación con diversos procedementos ordinarios relativos a impugnacións de autorizacións de parques eólicos, por parte da presidencia da Sección Terceira comezáronse a comunicarlle ás partes os cambios de composición da Sección e dos maxistrados/as relatores/as, sen facer mención algunha ao contido das mentadas resolucións, ás que as partes, no seu caso, accederon a través dos medios de comunicación.

3ª. Non é función da entidade que subscribe o presente escrito a defensa dos dereitos de que son titulares os maxistrados e maxistradas afectados polos traslados de Sección acordados, mais si o é a defensa dos intereses colectivos que estatutariamente lles corresponde e, polo tanto, a defensa dos dereitos de que somos titulares con respecto á nosa posición procesual nos litixios en curso ante a Sección Terceira da Sala do Contencioso-Administrativo.

A ampliación da Rede Natura galega non pode agardar máis

• 31 colectivos ecoloxistas e naturalistas galegos reclaman a ampliación urxente e a mellora da xestión dos espazos naturais protexidos do país no Día Europeo da Rede Natura 2000.
• O presente manifesto estará aberto a novas adhesións de entidades e colectivos ata o 4 de xuño.

Galiza, 21 de maio de 2024

Hoxe, Día Europeo da Rede Natura 2000, aproveitamos para reivindicar a protección efectiva da natureza. Porque esta rede de espazos naturais protexidos, creados ao amparo das directivas de Hábitats e de Aves, é imprescindible para que a biodiversidade europea teña unha oportunidade de futuro.

Entidades ambientalistas e particulares en toda Europa reclamamos ás administracións que apliquen todas as medidas necesarias para garantir a neutralización de impactos e a restauración de hábitats naturais en todos os espazos protexidos da Rede Natura 2000, sexan Zonas Especiais de Conservación ou Zonas de Especial Protección para as Aves.

Ademais, as entidades asinantes pedimos que se amplíe a superficie de Rede Natura 2000 no territorio terrestre galego de maneira urxente, de forma que, como mínimo, se triplique a superficie protexida antes do ano 2030. Isto suporía pasar do ridículo 12% do territorio terrestre galego protexido actualmente -na cola do estado español- ata un 36% a seis anos vista, porcentaxe que xa permitiría asegurar a conectividade de hábitats e especies de conservación prioritaria.

A Plataforma pola Protección da Serra do Galiñeiro oponse á construción dun observatorio astronómico neste espazo natural

O observatorio astronómico de Forcarei, de dimensións similares e vinculado á UVigo.

A Plataforma pola Protección da Serra do Galiñeiro oponse á construción dun observatorio astronómico na Serra polas seguintes razóns:

1. A súa construción acarreará un incremento do tráfico nocturno de vehículos pola Serra aumentando os atropelos de anfibios, algúns deles catalogados, como é o caso do sapo curriqueiro (Epidalea calamita), especie incluida no Anexo IV da Directiva 92/43/CEE, relativa á conservación dos hábitats naturais e da fauna e flora silvestres.

• A súa construción supón un impacto no ecosistema da Serra do Galiñeiro.

• A súa construción supón un impacto na paisaxe da Serra do Galiñeiro.

• A súa construción carece de sentido debido ó grao de contaminación lumínica que os propios promotores do proxecto recoñecen.

• Débense evitar a proliferación de construcións innecesarias neste espazo natural.

A serra da Groba queda de momento libre de eólicos: cuarto proxecto tombado polo seu impacto ambiental

Fonte: Praza.gal

Cabalos salvaxes na serra da Groba e resolución ambiental desfavorable do cuarto proxecto eólico previsto para a zona CC-BY-SA Praza Pública – SOS Groba

A Consellería de Medio Ambiente vén de publicar este mércores no Diario Oficial de Galicia a declaración ambiental desfavorable do parque eólico Torroña I, que se pretendía instalar na serra da Groba, última gran serra litoral galega sen este tipo de instalacións. É o cuarto proxecto tombado nos últimos meses nesta zona polo seu impacto ambiental e xa non quedan de momento máis iniciativas pendentes de tramitar, tras desbotar outros promotores as súas antes mesmo desta fase de avaliación ambiental.

Emprazamento na serra da Groba do parque éolico Torroña I agora desbotado ambientalmente CC-BY-SA Xunta de Galicia.

A serra da Groba leva anos no obxectivo de diversas empresas promotoras de parques eólicos e outro tipo de instalacións enerxéticas, ante as que se vén levantando unha importante contestación por parte da veciñanza e dos concellos de todas as cores políticas das comarcas do Val Miñor e do Baixo Miño polas que se estende este espazo natural, que conta con hábitats que o Goberno galego vén evitando protexer.

En setembro de 2022 Medio Ambiente declaraba inviable o primeiro parque eólico analizado, denominado Albariño I, criticando as eivas dos estudos ambientais realizados pola súa empresa promotora, que obviaran a presenza na zona de especies protexidas. Dous meses máis tarde tamén era invalidado o parque denominado O Merendón, salientando neste caso a Xunta que o seu impacto paisaxístico sería “crítico”. E o pasado novembro era o proxecto denominado Toroña o invalidado ambientalmente polo seu impacto sobre bens patrimoniais, sobre as aves rapaces, “sobre a saúde das persoas” polos “efectos do ruído e parpadeo de sombras” e sobre a paisaxe, novamente cun “impacto crítico” neste último eido.

Marcha contra os eólicos na serra da Groba en 2020 © SOS Groba.

Agora tócalle a quenda ao parque Torroña I, impulsado por Desarrollos Renovables del Norte e que contaría con 22,8 MW repartidos en catro aeroxeradores entre os concellos de Baiona, Oia e Tomiño, entre a ría de Vigo e o río Miño. Segundo a avaliación ambiental feita pública este mércores, o seu impacto tería “repercusións negativas sobre o patrimonio arqueolóxico e a paisaxe”, segundo os informes sectoriais emitidos pola Dirección Xeral de Patrimonio Cultural e polo Instituto de Estudos do Territorio. 

• David ReineroXornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

A Plataforma do Galiñeiro e as charlas non institutos da contorna.

A Plataforma pola Protección da serra do Galiñeiro, entre outras actividades que desenvolve, leva anos dando charlas nos institutos da contorna para dar a coñecer o patrimonio deste espazo natural. Os valores da serra deberan ter máis protección da que na realidade lle confiren as distintas Administracións, que en suma é simplemente a de espazo forestal xenérico reflectida nos distintos PXOMs dos concellos aos que pertence o seu territorio.

Esta Plataforma considera que a divulgación dos valores naturais e antrópicos de Galiñeiro posibilita que as xeracións futuras e a cidadanía en xeral cheguen a valorar este espazo na xusta medida.

 A primeira parte da charla está dedicada aos valores naturais, atendendo primeiro á complexa xeoloxía do lugar lugar enmarcada na xeoloxía de Galicia e comezando polos conceptos básicos desta ciencia. Os elementos biolóxicos, algúns de destacado interese, son os que se explican a continuación.

A segunda parte da charla comeza tratando os valores antrópicos dende o paleolítico ata a actualidade para rematar explicando a loita social que esta Plataforma leva a cabo e as razóns da súa existencia.

As fotos que siguen amosan momentos de charlas en distintos institutos dos Concellos aos que pertence Galiñeiro (e outros limítrofes)  aos que fomos chamados/as polo profesorado de Filosofía, Ciencias Naturais e Ciencias Sociais. Estivemos en Beade, Mos e Gondomar e esperamos que este labor desenvolvido nos últimos anos siga a incrementarse no futuro.

Charla informativa en Trives o vindeiro venres, 23 de xunio ás 20:00h.

O vindeiro venres 23 de xunio ás 20.00 h., a Plataforma participará nunha charla informativa que se celebrará no Auditorio Julio Vázquez.

Esperamos a vosa asistencia.

Inauguración da escultura “O guerreiro do Galiñeiro”

A Plataforma pola protección da serra do Galiñeiro, estivo presente na inauguración da escultura “O Guerreiro do Galiñeiro” obra do escultor mosense Marcos Escudero, en homenaxe ás persoas e entidades que loitan pola protección da serra do Galiñeiro.

Milleiros de persoas rodearon onte o edificio da Xunta para esixir o rexeitamento de máis de 75 proxectos macroeólicos especulativos.

●     A Coordinadora Eólica Así Non advirte dos danos irreparábeis e sen precedentes desta vaga eólica no país.

• Este martes, 25 de abril, é a data límite na que máis de 75 macroproxectos eólicos poderían obter autorización previa administrativa da Xunta.
• Esixen a paralización de todos os proxectos eólicos en tramitación mentres non haxa unha planificación enerxética ao servizo do pobo, pública, xusta e ecolóxica.

Santiago de Compostela, a 23 de abril de 2022.- Este domingo, 23 de abril, a Coordinadora “Eólica Así Non” volveu mobilizar ao pobo galego en contra da actual depredación macroeólica especulativa, que desta volta, conseguiu rodear cunha cadea humana multitudinaria todo o perímetro das depedencias da Xunta de Galicia, en San Caetano, Santiago de Compostela. A pesar da chuvia, máis de 2000 persoas acudiron á mobilizacón de “Eólica Así Non” para esixirlle á Xunta de Galicia o rexeitamento de máis de

75 proxectos eólicos que xa contan coa declaración de impacto ambiental favorable da Consellaría de Medio Ambiente, e que nos vindeiros dous días poderían acadar a autorización previa administrativa do goberno galego. O vindeiro 25 de abril é a data límite establecida polo Real Decreto-Lei 23/2020 para que 77 parques eólicos tramitados na Xunta obteñan autorización administrativa e manteñan vixente o permiso de conexión á rede. Ao mesmo tempo, os milleiros de manifestantes congregados arredor do edificio administrativo da Xunta instaron ao Executivo galego a paralizar outros máis de 150 proxectos eólicos que, malia á suposta moratoria eólica de Feijóo, manteñen en curso a súa tramitación, coa pretensión de seren autorizados.

Desde a Coordinadora Eóilca Así Non advírtese dos danos irreversíbeis ambientais, patrimoniais, sociais e económicos que esta vaga eólica carrexará para o país se os gobernos galego e estatal non frean tal despropósito e non planifican adecuadamente a implantación de renovábeis. Lembra que todas as máis de 200 entidades e colectivos que

conforman a Coordinadora apoian as enerxías renovábeis para acadar unha transición ecolóxica e socialmente xusta, pero non a calquera prezo. Os máis de 75 macroproxectos eólicos que a Xunta está a punto de autorizar, sen unha adecuada avaliación ambiental e por vías exprés e antidemocráticas, poñen en risco a preservación dos espazos naturais de maior valor ambiental do país e a conectividade ecolóxica, a disposición de recursos básicos para a vida como a auga, destrúen biodiversidade e moitos dos ecosistemas que son imprescindíbeis para afrontar o reto climático, eliminan terras de cultivo de alimentos, destrúen a paisaxe e patrimonio histórico e cultural, prexudican formas de vida tradicionais e sustentábeis, expulsan as persoas do rural e poderían afectar de forma singular á saúde das poboacións máis próximas aos aeroxeradores, alén da depreciación de valor que sufrirán todos os bens e inmobles situados dentro das poligonais eólicas.

“As consecuencias serían dramáticas. A autorización destes proxectos sería unha auténtica catástrofe ambiental e social sen precedentes, na que en especial o medio ambiente e o rural galegos ficarían dilapidados para sempre e en mans de multinacionais destrutoras do territorio. Os galegos e galegas non podemos nin debemos tolerar este asalto ao país, e así llo facemos saber aos que nos gobernan”.

Manifesto para a mobilización do 23 de abril

Este martes 25 de abril é a data límite establecida pola normativa vixente para outorgar autorización previa aos proxectos eólicos promovidos en Galiza con declaración de impacto ambiental favorábel. Desde a Coordinadora Eólica Así Non fixemos esta convocatoria a participar nesta nova mobilización en Santiago de Compostela aos galegos e galegas, ás plataformas de veciños e veciñas afectadas e a todo tipo de colectivos e entidades críticas co actual modelo depredador da enerxía eólica. E así, rodeamos hoxe o edificio da Xunta de Galicia aquí en San Caetano, para manifestar a nosa repulsa aos 77 proxectos eólicos con declaración de impacto ambiental positiva, cuxa aprobación podería ser este mesmo martes.

E que buscamos con esta mobilización? Queremos exixir ao executivo galego que denegue as autorizacións das ducias de macroparques eólicos aos que a Consellaría de Medio Ambiente xa outorgou permiso ambiental o pasado mes de xaneiro. Estes 77 parques eólicos teñen de prazo límite ata este 25 de abril para poder acadar autorización previa administrativa por parte da Xunta.

Tamén exiximos a inmediata paralización duns 150 expedientes eólicos que a Xunta de Galiza aínda mantén en tramitación.

A Plataforma participará os vindeiros 4 e 5 de febreiro nas xornadas “Temos Alternativa”