Grazas a todas e todos pola vosa solidariedade !!!

2 Nov

Despois de termos asimilado o acontecido, e calmados todos os sentimentos que abrollaron ante tamaña desfeita a tódolos niveis, sabemos que nos temos que dirixir ás persoas, que nestas datas foron quen de estar ahí, ao pé do Galiñeiro, preocupadas polo seu futuro e artellando xeitos de axudar na súa recuperación.

Tedes que ter en conta, que para moitos de nós, o Gali é como unha parte máis do noso corpo, a paisaxe que vemos e sentimos máis próxima, que mantén o aire que respiramos, a terra na que plantamos, a rocha na que cimentamos as nosas casas, e que nos regala a auga coa que circulamos tódolos seres vivos que nos mantemos grazas a el.

Os periodos de dor son estranos, e dependen de moitísimos factores, culturais, familiares, relixiosos…, pero moitas de nós, só podemos sentir unha fondísima tristura, a pesares de que estamos seguras de que “a nosa terriña é moi boa, e que todo volverá rebrotar”. Moitas das persoas que formamos a Plataforma Pola Defensa da Serra do Galiñeiro aínda non nos atrevemos a levantar os ollos cada vez que saimos da casa, para non percibir cos ollos, o co naris, é unha peste a queimado que dá arcadas.

Por outra banda, somos conscientes que temos que pomos coa cabeza a pensar en que facer, e como seguir adiante co proxecto de Parque Natural, ante tanta devastación. Podemos falar de moitos culpables, podemos pensar que unha vez máis, o lume chegou, e como non, volverá a pasar, como algo que xa temos asumido, porque o levamos vivindo así dende sempre. Todas as persoas que andamos no monte, somos moi conscientes de que hai UN culpable, UN, que estraga solos e humedais, que inza a nosa terra de follas, caracolas e paus, que non xeneran máis que broza, que nin para estrume serve, pero si que arde moi ben, e por enriba, revive co lume e espállase por onde quixer. Non lle vou dar a categoría de algo, por iso non o nomeo, non quero polo ao mesmo nivel que as ovellas, as cabras, as vespas, as abellas, as eguas, as raposas, e todas aquelas criaturas que nos quitou. Por non ter, non ten nin un verde que dea vida, é un verde agoniado.

A Plataforma pola Protección da Serra do Galiñeiro está composta por colectivos moi diversos e especializados, en temas moi diferentes no entorno natural e cultural da Serra. Por eso, nos gostaría que se contara con nós á hora de facer calquera actuación no monte, co ánimo de asesorar para preservar aquelo que sabemos que o mantén, como unha serra moi especial.

Por outra banda, sabemos que o voluntariado ten toda a vontade de axudar, pero as repoboacións, si é que se decide facelas, as talas e outras actuacións, deberían ser o máis selectas e coidadosas posibles, porque desta volta, o que aconteceu é moi grave e de grandes dimensións, e podemos estragar o monte para sempre.

Para preservar o Galiñeiro hai que querelo e respetalo, deixalo recuperarse en paz e loitar pola súa conservación, na medida das nosas posibilidades. Non esquencernos de que sobre el, están proxectadas outras desfeitas tan perigosas como o lume ou os monocultivos, por iso recordamos, que calquera época é boa para achegarnos ao Galiñeiro e dende calquera lugar, imos ter que activar as nosas forzas, na súa conservación.

Plataforma Pola Conservación da Serra do Galiñeiro.

LUMES NUNCA MÁIS !!! Domingo 22 de outubro ás 12:00h na alameda de Compostela

21 Out

Outra vez.

O monte e o caos. Un caos que medra ano tras ano. Fomentado por malnacidos. Permitido por irresponsables. Contemplado con impotencia por quen non o fomenta, nin o permite, pero non pode combatilo. Non a esta escala.

É cuestión de tempo. E de seca. E de temperatura, e de vento. E chega o lume. Tráeno os malnacidos, sós ou organizados. Tráeno, ás veces, irresponsables descoidados. Tráeo, ás veces, a propia natureza. E o vento fai o resto.

Caos, vento e lume. Lume que traba no monte como un can danado.

E loita. Unha loita contra o lume e contra o espanto. Unha loita desigual, desesperada, impotente.

E destrución. E mortos. E desolación. E rabia.

Fartos.

Fartos de estar fartos. Fartos de sempre o mesmo. Fartos do egoísmo destrutivo dos que se benefician do caos. Fartos do desleixo e da connivencia hipócrita das mal chamadas autoridades. Fartos da desgracia recorrente, de estar apuntando remedios ano tras ano e de que, ano tras ano, todo empeore.

Tocounos, outra vez, a todos. Pero esta vez tocounos, concretamente, a nós. A serra do Galiñeiro ardeu. Era cuestión de tempo. De que se deran as condicións idóneas para o desastre. E déronse o domingo pasado. Máis de 35.000 ha. arrasadas nun só día. E, con elas, o Galiñeiro. Catro persoas mortas. E puideron ser moitísimas máis.

Psaron once anos desde o desastre do 2006, e catro anos dende o desastre de Oia, A Guarda, O Rosal, Tomiño e Tui. E a situación non mellorou en nada. Empeorou.

Feijoo fala de “terrorismo ambiental”. En canto aos incendiarios, ten razón, son terroristas. Pero tamén son terroristas os que promoven os actos incendiarios e os incendios accidentais por acción ou por omision.

Acaso non é terrorismo ambiental:

  • Que o goberno do estado, estando en funcións, amplíe a concesión a ENCE por 60 anos máis, dando continuidade e intensificando a promoción e subvención do cultivo de eucaliptos, disuadindo a recuperación das especies arbóreas autóctonas e convertendo o monte nun polvorín?
  • Que o goberno galego privatice o servizo aéreo contra incendios, transformando un servizo público que ten a finalidade de combatir os incendios forestais nunha trama privada que vive precisamente deles, ata o punto de que tal trama está a ser investigada pola Audiencia Nacional e que trascende incluso o territorio estatal para facerse internacional?
  • Que o goberno galego aprobe a modificación da lei de montes para recalificar terreos queimados e así poder desenvolver neles plans e proxectos que sexan declarados de interese público, declaración que se outorga espúria e discrecionalmente pola propia Xunta?
  • Que o goberno galego aprobe a lei de fomento empresarial (merecidamente coñecida como Lei de Depredación de Galiza) lei que permitirá a tramitación urxente de permisos industriais e empresariais incluso en terreos arrasados, que o faga cos únicos votos do PP, e que o faga dous días despois destes devastadores incendios, con Galiza ainda ardendo?
  • Que o goberno galego vire a faciana ante a realidade e os efectos do cambio climático na Galiza?

Terror é o que pasamos as galegas e galegos o pasado domingo, cando lapas de 25 e 30 metros rodeaban a nosa xente, as nosas hortas, o noso lar, as nosas casas, a nosa terra. Galicia estaba espantada, e choraba de dor, e de raiba.

Terrorista é o que prende o lume, pero tamén o que converte o monte nun polvorín, e así o mantén, ano tras ano, década tras década.

Volver a falar das causas dos lumes, do que hai e do que non hai que facer antes, durante e despois dos incendios, do desleixo do monte, das árbores pirófitas e das autóctonas, de cando e como limpar o monte, de cando e como retirar a madeira queimada, de como protexer e rexenerar o solo queimado, de como iniciar a revexetación… todo isto é, segue sendo, necesario.

Pero os gobernos galego e o estatal converten este debate, que se ven repetindo dende hai anos, sobre todo dende o ano 2006, nunha cantarela inútil, porque non só non fan caso, senón que toman medidas a contrario sensu, que non fan máis que avivar o lume.

Por iso debemos acudir o vindeiro domingo 22 á manifestación que se celebrará as 12:00h en Santiago de Compostela.

Fartos xa de estar fartos,

LUMES NUNCA MÁIS !!!

E memoria. Non perdamos a memoria de quen é quen devasta o país.

Seguir lendo

Imaxe

GeoloRutas – Monte Galiñeiro.

4 Xul

Galinheiro

Galería

Fotos da VI Andaina pola protección da serra do Galiñeiro

19 Abr

Grazas pola andaina !!!

18 Abr

Amigas e amigos de Galiñeiro: grazas pola vosa participación!!!!

 IMG-20160417-WA0017

Un ano máis demostramos que Galiñeiro nos importa. A pesares da climatoloxía alí estabamos, aproveitando o avelo que o tempo nos deu para percorrer a serra por outro roteiro, para seguir demandando protección para ela, para disfrutala, para compartila.

Esta vez foi a vertente oeste, foi a parte sur, foi Prado, Vincios, Vilas… foi a mina abandonada, foron as pistas, foron os antigos camiños en desuso, foi a chan de mámoas, foi o alto dos Penidos… e seguimos a ser moitos /as, máis de medio milleiro, os/as que entre a chuvia do sábado e os batagóns da vindeira semana saímos a pedir un parque natural para a serra de Galiñeiro.

Grazas as/aos participantes, á comisión de festas de Prado, ao polveiro e á rosquilleira que nos diron de comer, aos gaiteiros “Balcón do Val Miñor” de Morgadáns que nos abriu a Andaina con alegría, a Benito que puxo o son, a Manolo Pipas que nos leu os seus poemas, á Bagunda que nos amenizou, e a Fran Alonso que fixo este estupendo manifesto que vos achegamos.

Grazas

Manifesto lido por Fran Alonso ao remate da VI Andaina

Poesías de Manolo Pipas dedicadas á serra do Galiñeiro

VI Andaina: A festa está asegurada !!!

15 Abr

O principio da Andaina, haberá a actuación dos Gaiteiros de Morgadáns.

Á chegada (15:00 – 15:30 h) haberá:

  • Lectura do manifesto a cargo de Fran Alonso
  • Actuación de Rena Renato, animador socio-cultural
  • Actuación de Mónica de Nut e Luis Martínez
  • Recital de Manolo Pipas
  • Actuación de A Bagunda. Orquesta Autóctona Republicana

NON FALTEDES !!!

IMG_6767

Confirmamos a celebración da VI Andaina. Esperámosvos o domingo ás 10:30h

15 Abr

Amigas e amigos de Galiñeiro: o tempo meteorolóxico danos un avelo para celebrarmos a nosa VI Andaina pola protección da Serra do Galiñeiro! Así que este domingo 17 de abril ás 10.30 da mañán esperámosvos en Prado – Morgadáns – Gondomar.

O lugar onde vos convocamos expresa moi ben o carácter da paisaxe cultural e natural da serra do Galiñeiro, unidas indisolublemente entre si: Os prados e socalcos agrícolas de Vilas e Prado, formas inmemoriais de xestión e conservación dos solos, os rabaños de cabras e ovellas de monte que aínda perviven, ou as últimas e a cada vez máis reducidas mandas de cabalos salvaxes moldeando os matos e panasqueiras da serra, confírenlle un carácter singular a estas terras e montes. Usos tradicionais que resultan de vital importancia para a conservación dos valores ambientais da serra, que deberán ser preservados e promovidos dende a Administración o día que esta acade por fin a protección legal que merece.

VI Andaina_R1_res web-2

Seguir lendo

Imaxe

Mapa do percorrido da VI andaina pola protección da serra do Galiñeiro

7 Abr

VI Andaina_R1_res web-2

VI Andaina pola protección da serra do Galiñeiro

4 Abr

Amigos e amigas de Galiñeiro: RECORDÁMOSVOS que o domingo 17 de abril temos unha cita.

Esta Plataforma convoca a VI Andaina pola protección da Serra do Galiñeiro, que tivo de ser suspendida o pasado día 4 de outubro a causa das condicións meteorolóxicas. A saída terá lugar no mesmo lugar de entón: a capela de S. Xosé de Prado (Morgadáns, Gondomar), ás 10.30 h. da mañán. Despois de realizarmos un percorrido circular pola serra, voltaremos ao punto do inicio en torno ás 14.30 h. A continuación desfrutaremos dun merecido descanso e das intervencións dos/as artistas convidados/as que se uniron altruistamente á causa do Galiñeiro.

 cartaz_vi_andaina_gali__eiro_Page_1

Seguir lendo

Domingo 17 de abril: VI andaina pola protección da serra do Galiñeiro

19 Mar

Estimados/as seguidoras e seguidores da Plataforma: aquí estamos un ano máis!!!

O domingo 17 de abril temos unha cita con vós. Adxuntamos o cartaz.

Facemos un chamamento a todas as persoas que sintan o Galiñeiro como seu para que colaboren con esta Plataforma. Este chamamento é extensible a todas as organizacións, asociacións e entidades de toda a redonda a participar na medida das súas posibilidades, e no xeito que eles e elas estimen, a traballar con nós na protección desta serra.

O ROTEIRO comezará en S. Xosé de Prado as 10:30h, atravesa a Chan das Moutas e sobe aos Altos da Paxariña, continúa pola ladeira da Lomba da Zorra ata o petróglifo de Agua da Laxe en Vincios. Volve polos montes de Vilas ata rematar en S. Xosé de Prado.

CHEGADA: Ao mesmo punto ás 15:00H. Aprox.

Lonxitude aproximada 12 km (4:00-4,30h).

Nivel do roteiro medio baixo, sendeiros doados con poucos treitos de desnivel. Haberá un roteiro alternativo de só 6 km.

Apuntade nas vosas axendas !!!

Vémonos en Prado- Morgadáns- Gondomar!!!!

 

CARTAZ VI Anadaina Galiñeiro

Baixar cartaz en pdf.