Archive | Novembro, 2012

A Plataforma presenta alegación contra o Proxecto de Parque eólico na Serra do Galiñeiro

30 Nov

Hoxe día 30 de novembro a Plataforma pola Protección da Serra do Galiñeiro presentou a súa alegación ao Proxecto de parque eólico na citada serra. A pesar das dificultades que a Administración nos puxo, preparamos un  extenso argumentario ante as distintas infracións que o proxectado  polígono eólico infrinxiría na serra do Galiñeiro.

Centaurea limbata

O prazo para preparar o documento de alegación foi de só un mes, do  que os primeiros días non tiñamos practicamente acceso ao Proxecto, ao  tratarse este de un extenso documento de centos de páxinas e planos  que só podiamos consultar nas oficinas dos concellos ou da consellería  de industria. O documento dixitalizado tivo que ser pedido á Xunta e  conseguido con esforzo. Foi só na última semana, e cando se nos  comunicou que non daban ampliación do prazo de alegacións, que nos  enviaron o Proxecto en formato dixital.

Esta Plataforma conseguiu redactar en poucos días e coa adicación do  tempo libre dos seus membros, un traballo máis exahustivo do que  fixeron no gabinete de redacción do estudo de impacto de Terra do  Vento, que nalgúns aspectos é unha redacción teórica copiada de  diversas fontes e sen estudo de campo.

Os estudos de impacto son encargados como trámites, e aínda que en  ocasións son estudos feitos por profesionais serios, noutros casos coa  súa desidia burlan e desprezan os valores desta serra.

Queremos dar as grazas unha vez máis a toda a xente que colaborou asinando a alegación persoal pedindo a retirada do Proxecto de Parque eólica na serra do Galiñeiro. Gracias a todas e todos eles, presentamos máis de 8.000 alegacións no rexistro da Xunta.

Agradecementos

26 Nov

Queremos agradecervos as miles de alegacións que xuntamos en contra do poligono eólico. Especialmente a aquelas persoas que colaboraron na entrega do formulario e da recollida do mesmo. Sabemos que somos muitos e muitas aos que nos preocupa o Galiñeiro pero para os que estamos na Plataforma é unha axuda mui grande contar con persoas tan dispostas a traballar. A axuda é tanto física como anímica. 

Que saibades que a Plataforma desexa que máis persoas e asociacións ou organizacións entren a formar parte dela. Só dese xeito poderemos protexer este espazo natural. Parécenos que hoxe por hoxe non hai outro camiño. Non tendes máis que dirixirvos a nós. 

Aproveitamos para anunciar aos que queiran acompañarnos, que o mércores día 28, ás 11,30, faremos a entrega masiva no rexistro do edificio administrativo da Xunta, en Vigo, dos  miles de alegacións individuais en contra do parque eólico que recollimos durante este mes.  

Se aínda non deixaches a túa nos lugares indicados, faino. Non obstante aqueles/as que aínda non cumprimentasen a súa alegación ou non nola diran a nós, que saiban que teñen de prazo ata o día 30 para entregala en calquera rexistro da administración autonómica ou local. 

Ánimo en contra da especulación! Neste caso especulación eólica!

 25 Novembro 2012

Agradecementos e avisos

15 Nov

Esta Plataforma agradece a colaboración das cinco mil persoas que hoxe asinaron a alegación en contra do Proxecto do parque eólico na serra do Galiñeiro que está a exposición pública ata o 30 de novembro.

A marea de xente que inundou Vigo protestando contra a política gubernamental dos últimos anos viu unha causa xusta na Plataforma pola protección da serra do Galiñeiro.

Muitas grazas a todas e a todos e en especial aos que colaborastes con nós no reparto das alegacións.

Se nós, os usuarios do Galiñeiro, as que disfrutamos nel, os que o amamos e as que tiramos utilidade del, nos opoñemos a que instalen un poligono desas características aí, a Administración da Xunta non será capaz de declarar de Utilidade Pública unha instalación que coa disculpa das enerxías renovables entrégalle o monte a unha multinacional que o único que ten de galega é o nome TERRA DO VENTO, inscrita en Ourense tan só un mes antes de facerse con este negocio.

Para conseguilo temos que xuntar muitas muitas ALEGACIÓNS en contra. Se os que te rodean aínda non alegaron, ou ti mesmo/a, aínda non cubriches unha, podes descargar a que aquí che porpoñemos. Tamén podes facela ao teu gusto.

As alegacións entréganse en calquera oficina da Xunta ou en Concellos que teñan o chamado portelo único, pero se prefires podes deixala nestes sitios que che facilitamos para despois entregármolas todas xuntas nun acto reivindicativo.

Forza e avante!!!

 

ONDE DEIXAR A TÚA ALEGACIÓN XA CUMPRIMENTADA

 

SANTIAGO DE COMPOSTELA:

  • Local de ADEGA. R/ Travesa de Basquiños 9. Horario de oficina.

PONTEAREAS:

  • I.E.S: A Granxa. Horario escolar.

O MORRAZO:

  • R/ Palmás 2. DOMAIO. (É a Estrada Provincial).

VIGO:

  • Centro: Pi y Margall 53: “Terra, Deporte e  Aventura”. Horario de comercio.
  •  As Travesas: Avd. do Fragoso 43: “Imaginarte”.  Horario de comercio. 
  • Cooperativa de consumo consciente ÁRBORE. R/ Arquitecto Pérez Bellas nº 5 
  • Tenda de informática HISPAVIGO. Hispanidade 104.

 GONDOMAR:

  • IEM.  Avd. da Feira, 10. De 7 a 10 da noite. 
  • Librería LIBRAIDA. Horario de comercio. 
  • VINCIOS: Centro Cultural: Nas oficinas. Horario de oficina.

             Na cafeteria: Pola tarde e pola noite.

NIGRÁN:

  • PATOS.Escola de surf.
  • A RAMALLOSA. Tenda de fotocopias DUPLICOLOR. Rúa Romana Baixa, nº 3.

O PORRIÑO:

  • Copistería COPIREY.  Na zona de As Torres.
  • Xoguetería Tia Tata.  Nos soportais á beira do Froid. 
  • Desgüaces Novo. En Torneiros, na estrada do Porriño a Pontellas.

TUI:

  • Cafetería “La Gran Manzana”. Na Corredera.

Alegacións contra os eólicos no Galiñeiro

8 Nov

Bo día, defensores e defensoras da serra do Galiñeiro: 

Aquí estamos nun momento díficil pedindo o voso apoio. Trátase neste caso de asinar unha alegación en contra do Proxecto do “Parque Eólico Serra do Galiñeiro. Se somos moitos e moitas podemos paralo!!! 

É sabido de todos que os polígonos eólicos non se poñen onde hai máis vento, nin onde destragan menos a natureza, nin onde fai máis falla a enerxía, nin onde máis necesidades económicas ten a poboación. Póñense onde menos oposición atopan as multinacionais para a súa construción. Naqueles lugares en que a montaña, as serras ou campo están abandonados, e os seus propietarios e os poucos veciños que alí quedan non teñen nada mellor que facer co monte que entregarllo por “dúas chicas” aos especuladores. 

Os e as que formamos a Plataforma pola Protección da serra do Galiñeiro estamos convencidos/as de que este non é o caso da bisbarra de Vigo e menos dos que vivimos arredor desta emblemática serra. Ao Galiñeiro dámoslle moitos usos e tiramos moito proveito del e por riba de todo disfrutamos del. 

Pretendemos inundar as Consellerías de Economía e Industria e de Medio Ambiente Territorio e Infraestruturas coas nosas alegacións. Que todo aquel/aquela que sinta o Galiñeiro como seu manifeste a súa oposición a que esta serra nola usurpen e lle sexa entregada por uns míseros euros anuais, e de por vida, a unha empresa da que o único beneficiario que coñecemos é un banco suizo. 

Temos ata o 30 de novembro para facelo. Pero como sempre é mellor non deixalo para a última hora. Podes entregar a alegación ti mesmo/a nas dependencias da Xunta en calquera provincia ou nos concellos e outros organismos que teñan portelo único. Pero se tes dificultade para ir a eses lugares podes deixala nos puntos que máis abaixo indicamos antes do 25 de novembro, onde nós as recolleremos e despois as entregaremos todas xuntas.

Por suposto que ti podes facer a alegación que che praza se non che gusta a que che propoñemos. Que saibas que moitas asociacións están preparando a súa e que a Plataforma está traballando para presentar unha moi exahustiva e fundamentada. 

Aproveitamos esta comunicación para facervos saber que o mércores día 14 estaremos na manifestación da folga xeral denunciando o problema do Galiñeiro e dándolle á xente a asinar esta alegación. Atoparasnos na praza de España e na praza de América. Así mesmo o venres 16 de novembro ás 7 da tarde estaremos diante do MARCO na rúa do Príncipe en Vigo para recoller o apoio dos veciños de Vigo a esta causa e que todos/as asinen esta alegación.

ONDE DEIXAR AS ALEGACIÓNS:

  1. Entregárnolas a nós nestes actos.
  2.  Entregalas directamente nas dependencias da Xunta ou en calquera “portelo único” dos concellos ou outras institucións.
  3. Nestes sitios que indicamos:
  • Santiago de Compostela: Local de ADEGA. R/ Travesa de Basquiños 9. Horario de oficina.
  • Ponteareas: I:E:S: A Granxa. Horario escolar.
  • O Morrazo: R/ Pamás 2. DOMAIO. (É a Estrada Provincial)
  • Vigo. Centro: Pi y Margall 53: Terra, Deporte e Aventura. Horario de comercio.
  • Vigo. As Travesas: Avd. do Fragoso 43: Imaginarte. Horario de comercio.
  • Gondomar: IEM. Avd. da Feira, 10. De 7 a 10 da noite.
  • Gondomar: Librería Libraida. Horario de comercio.
  • Vincios (Gondomar): Centro Cultural: Nas oficinas. Horario de oficina. ou na cafeteria: Pola tarde e pola noite.

Ánimo! Ánimo! Ánimo!

Descargar alegación.