Arquivo | Abril, 2012

Domingo 13 de maio: III Andaina pola protección da Serra do Galiñeiro

30 Abr

Desde esta Plataforma convidámosvos a todas e a todos, desde a xente maior ata os pequenos e pequenas da casa, á III Andaina Pola Protección da Serra do Galiñeiro. Nesta ocasión realizaremos un novo percorrido, que denominamos a Ruta da Auga.

O vindeiro domingo 13 de maio, terá lugar a III Andaina pola Protección da Serra do Galiñeiro.

Saída: Aparcamento do campo de fútbol A Pasaxe, en Vincios ás 10:30 h.

Chegada: Parque Forestal do Galiñeiro (Vincios) ás 14:30 h.

Para recoller de novo os carros, haberá un sendeiro perfectamente señalizado desde o Parque Forestal ata o aparcamento do campo de futbol. Todo costa abaixo. Tempo aproximado do percorrido: 15 minutos.

Toda a información aquí: III Andaina pola Protección da Serra do Galiñeiro

Ao remate:

Lectura manifesto a cargo do escritor

MANUEL RIVAS

 

Lectura de poemas a cargo de:

Pepe caccámo, Iago Castro, Silvia

Penas, Oriana Méndez e Anxo

Angueira.

 

Actuacións Musicais

Tino Baz, Cantareiras do Alba e

Leo Arremecághona
 
Non faltedes !!!
Advertisements

Manifesto en defensa da Serra do Galiñeiro

26 Abr

O avance do deterioro do medio natural en Galicia ten hoxe un dos máis claros e infamantes exemplos na grave situación que vive a Serra do Galiñeiro, espazo de extraordinario valor que comparten os concellos de Vigo, Gondomar, Mos, O Porriño e Tui.

            A  pesar de que no ano 2008 se anunciaba a ampliación do Parque Natural do Monte Aloia a todo o cordal da Serra do Galiñeiro, aínda hoxe a desprotección dos seus valores naturais, culturais, sociais e económicos continúa sendo total.

            Aínda hoxe os demostrados valores xeolóxicos, biolóxicos, paisaxísticos, históricos, arqueolóxicos, etnográficos, etc  deste espazo senlleiro no que se recoñecen os habitantes de todos estes concellos continúan estando en perigo diante das agresións producidas polo grave impacto de actividades irresponsables co medio (proliferación de canteiras, vertedoiros e pistas, política forestal de extensión de especies foráneas, destrución do patrimonio arqueolóxico…) e de proxectos que o degradarían irreversiblemente (parque eólico, estradas de circunvalación, industria trituradora…).

            O Corno do Demo e tódolos contos e lendas do Galiñeiro non teñen prezo. A gandería ecolóxica de pastoreo, os cabalos do monte e os curros de Vincios e de Morgadáns non teñen prezo. O lecer, os camiños, os subeiros, as pedras, as sombras, as augas, os estudos feitos e os que aínda se han facer, as illas ó lonxe, os poemas e os libros, o que perdemos e atopamos no Galiñeiro, nada de todo iso ten un valor calculable porque ese é un patrimonio común e natural que non se pode comprar nin vender, un patrimonio destas bisbarras, da Terra de Turonio, pero tamén de Galicia e mais da Humanidade.

            Cómpre rematar con todo isto. Cómpre que a Xunta de Galicia acometa dunha vez a protección da Serra. Cómpre que se estenda o Parque Natural do Monte Aloia a todo o cordal do Galiñeiro seguindo a lóxica do que é un mesmo ecosistema.

            Protexamos o que é noso e é de todos!  

            Protexamos a terra e mailo monte que nos deron!

            Protexamos o medio natural e a cultura!          

            Protexamos o Galiñeiro!

Seguir lendo

Manifesto de adhesións de persoas de relevo

10 Abr

Coa presenza de Méndez Ferrín, Presidente da RAG, Anxo Angueira, escritor e profesor da UVI, Uxía Senlle, cantante e Cristal Fernández, Vicepresidenta de Montañeiros Celtas, a Plataforma pola protección da Serra do Galiñeiro fará público o manifesto de adhesións de persoas de relevo no mundo da Cultura, a Universidade, o Deporte, as Artes escénicas que se pronuncian pola necesidade de que a serra sexa protexida como espazo senlleiro do Val Miñor no que se atopan os concellos de Vigo, Gondomar, O Porriño e Mos.

            Aproveitaremos ademais para facer tamén públicos o percorrido, contido e aspectos máis salientabeis da III Andaina pola serra, que desta volta transcorrerá pola zona Norte e que agardamos, que ao igual que as anteriores, sexa un completo éxito.

            O acto terá lugar o próximo xoves, día 12, ás 11,30, na Galería Sargadelos de Vigo na rúa Urzaiz nº 17.